ហ្សាកាតា៖ ភរិយាសម្តេចធិបតីនាយករដ្ឋមន្ត្រីកម្ពុជា លោកស្រី ពេជ ចន្ទមុន្នី ហ៊ុនម៉ាណែត អញ្ជើញចូលរួមកម្មវិធីសម្រាប់ភរិយាថ្នាក់ដឹកនាំជាន់ខ្ពស់ នៃបណ្តាប្រទេសអាស៊ាន និងដៃគូ អាស៊ាន។

ក្នុងឱកាសអញ្ជើញអមដំណើរសម្តេចធិបតីនាយករដ្ឋមន្ត្រី នៅថ្ងៃទី៦ ខែកញ្ញាឆ្នាំ២០២៣ ចូលរួមក្នុងកិច្ចប្រជុំកំពូលអាស៊ានលើកទី៤៣ និងកិច្ចប្រជុំពាក់ព័ន្ធ នៅប្រទេសឥណ្ឌូនេស៊ី លោកស្រី ពេជ ចន្ទមុន្នី ហ៊ុនម៉ាណែត បានអញ្ជើញចូលរួមកម្មវិធីសម្រាប់ភរិយាថ្នាក់ដឹកនាំជាន់ខ្ពស់ នៃបណ្តាប្រទេសអាស៊ាន និងដៃគូ អាស៊ាន ដោយមានវត្តមានភរិយាថ្នាក់ដឹកនាំជាន់ខ្ពស់សរុបចំនួន ១១រូប ចូលរួម។

ក្នុងកម្មវិធីដែលលោកស្រី ពេជ ចន្ទមុន្នី ហ៊ុនម៉ាណែត បានចូលរួមនេះមានការសម្តែង និងបង្ហាញអំពីសិល្បៈ វប្បធម៌ចម្រុះ និងមានការដាក់តាំងបង្ហាញនូវផលិតផលក្នុងស្រុកនានា នៃប្រទេសឥណ្ឌូណេស៊ី នៅសួន Taman Mini Indonesia Indah នៅទីក្រុងហ្សាការតា៕